Elín Hanna Kjartansdóttir og Kristjana Valgeirsdóttir, fyrrverandi starfsmenn stéttarfélagsins Eflingar sendu báðar frá sér tilkynningu í dag vegna brottrekstrar þeirra. Fréttablaðið greindi fyrst frá þessu.
„Ég á ekki nógu sterk orð yfir það virðingar-leysi sem formaður og framkvæmdastjóri Eflingar hefur sýnt okkur starfsmönnum og félagsmönnum með þessum málflutningi.“ segir í yfirlýsingu Elínar.
Í yfirlýsingunum er Viðar Þorsteinsson, framkvæmdarstjóri Eflingar harðlega gagnrýndur, en hann er meðal annars ásakaður um að neyða Kristjönu í veikindaleyfi og lygar.
„Það er aumkunarvert að næst stærsta verkalýðsfélag landsins skuli vera með forystu sem ræðst að starfsmönnum sínum, bolar þeim úr starfi og gerir þeim síðan upp kröfugerð sem aldrei hefur komið fram.“ segir í yfirlýsingu Kristjönu.
„Það er dapurlegt að stéttarfélagið Efling bjóði það eitt fram og það í fjölmiðlum, að reka okkur, starfs-menn, í dyr og tímafrek málaferli. Forysta Eflingar hagar sér þannig eins og verstu skúrkar í atvinnurekendastétt.“