Framkvæmdastjórn ESB telur sífellt líklegra að versta útgáfa Brexit verði að veruleika en það er svokölluð „no deal“ útganga. Í henni felst að þegar Brexit tekur gildi hafi samningar um útgönguna ekki náðst á milli ESB og Bretlands.

Mikill pólitískur óróleiki einkennir nú bresk stjórnmál og ákveðnar efasemdir eru uppi um framtíð Theresa May sem forsætisráðherra landsins.

Í fréttatilkynningu frá framkvæmdastjórninni kemur fram að þar sem sífellt líklegra sé að Bretar yfirgefi ESB þann 12. apríl án þess að hafa náð samningi um útgönguna þá hafi framkvæmdastjórnin í dag lokið undirbúningi sínum fyrir „no deal“ útgöngu.

Það sem er sérstaklega alvarlegt fyrir Breta í þessu samhengi er að ESB staðfestir um leið að um leið og Brexit tekur gildi verði tekið upp eftirlit með vörum frá Bretlandi og fylgst verði með hvort þær uppfylli kröfur ESB.

Eftirlit sem þetta mun hafa miklar truflanir í för með sér og valda miklum vanda beggja meginn Ermasunds. Hætt er við að innflutningur til Bretlands muni fara úr skorðum en Bretar þurfa að flytja ýmislegt inn sem þeir framleiða ekki nóg af sjálfir.