Félagsdómur felldi í gær úrskurð í svokölluðu „jafngildingarmáli“ Kennarasambands Íslands, vegna Félags grunnskólakennara, gegn Sambandi íslenskra sveitarfélaga. Úrskurður Félagsdóms er á þá leið að Samband íslenskra sveitarfélaga er sýknað af kröfu KÍ um að viðurkennt verði að kennarar með eldri leyfisbréf fái hækkanir til jafns við þá sem hafa leyfisbréf til kennslu á grundvelli meistaranáms.
Þetta þýðir að kennarar sem hafa leyfisbréf fyrir þann tíma þegar kennaranám var á meistarastigi fá ekki sömu launahækkanir og þeir sem eru með meisataragráðu. Þetta er sérstaklega algengt á meðal eldri leikskólakennara og mörgum þeirra finnst að sér vegið. Einn kennari sem DV ræddi við sagði að þarna væri á ferðinni ofmat á langskólamenntun og reynsla væri lítils metin.
Jafngildingarákvæðið er að finna í núgildandi kjarasamningi Félags gunnskólakennara og Sambandands íslenskra sveitgarfélaga, sem og kjarasamningi Félags leikskólakennara og sambandsins. Þar segir meðal annars: „Miða skal við að kennarapróf, sem lögum samkvæmt veita kennurum sömu starfsréttindi, séu jafngild til launa án tillits til þess, á hvaða tíma þau hafa verið tekin.“
Fyrir rúmu ári, í október 2018, gerði stjórn Félag gunnskólakennara kröfu um að kennarar fengju sömu laun óháð aldri kennsluréttinda í krafti jafngildingarákvæðisins. Samband íslenskra sveitarfélaga hafnaði þessari kröfu á þeim forsendum að sameiginlegur skilningur hefði verið ríkjandi um að jafngildingin um meistaranámið hefði í raun fallið úr gildi og ekki komið til framkvæmda eftir að fyrstu kennararnir útskrifuðust með meistaragráðu árið 2014.
Félagsdómur kemst að þeirri niðurstöðu að með samþykki nýrrar greinar 1.3.2.1 um persónuálag vegna viðbótarmenntunar, sem kom inn í gildandi kjarasamning aðila 2018, hefði félagið samþykkt tiltekið frávik frá jafngildisákvæðinu sem félagið byggði kröfu sína á.
„Eru þetta þakkirnar eftir 38 ára starf?“ spyr reynslumikill leikskólakennari eftir að dómurinn féll og annar segir í samtali við DV:
„Þarna er vegið að leikskólakennurum sem hafa unnið og fórnað sér til margra ára og ekki haft tækifæri eða löngun til að bæta við sig námi. En við viljum vera metin að verðleikum fyrir okkar starfsreynslu og að hafa lokið því hámarksnámi sem í boði var á sínum tíma.“