Reglugerð um vinnslu og heilbrigðiseftirlit með hvalaafurðum er talin hafa verið brotin af stjórnendum Hvals hf. Telur ríkissaksóknari að grunur leiki á um refsiverða háttsemi og hefur lögreglan á Vesturlandi málið til rannsóknar. Viðurlög kveða á um sektir eða fangelsi allt að tveimur árum. Fréttablaðið greinir frá.
Talið er að brotin hafi átt sér stað á þriggja ára tímabili, en málið hófst með kæru frá náttúruverndarsamtakanna Jarðavinum í fyrra á hendur Hval. Var verkun á hvalkjöti ekki talin í samræmi við reglugerð frá 2009 sem kveður á um að skera beri hvali undir yfirbyggingu, en ekki utandyra.
Matvælastofnun (MAST) hefur í þrígang gert athugasemdir við Hval hf, frá 2013-2015, þar sem Hvalur brást við með að byggja yfir hluta svæðisins og koma upp fuglalínum.
Ekki hafi hinsvegar komið til þvingunaraðgerða þá, þar sem hvalveiðar lágu niðri árin 2016 og 2017. Þá felldi Kristján Þór Júlíusson sjávarútvegsráðherra út skylduna um yfirbyggingu í nýrri reglugerð 2018, eftir að hafa fengið bréf frá eiganda Hvals, Kristjáni Loftssyni, þar um.
Samkvæmt ríkissaksóknara er rökstuddur grunur um að hvalskurður hafi verið stundaður á óyfirbyggðum skurðafleti á tímabili þegar það var skylt samkvæmt lögum.
„Með vísan til þess sem að framan er rakið er að áliti ríkissaksóknara uppi grunur um refsiverða háttsemi af hálfu kærða,“
segir í afstöðuskjali ríkissaksóknara.