Þórólfur Gíslason, kaupfélagsstjóri Kaupfélags Skagfirðinga, segir að það vanti mikið upp á að innviðir raforkukerfisins séu í lagi. Þetta hafi komið bersýnilega í ljós eftir óveðrið sem gekk yfir landið á þriðjudag og aðfaranótt miðvikudags en rafmagnsleysi hefur gert íbúum lífið leitt víða á landinu.
„Það er deginum ljósara eftir þetta gjörningaveður sem gengið hefur yfir að það vantar mjög mikið upp á það að innviðir raforkukerfisins séu í lagi. Það hlýtur að vera forgangsverkefni stjórnvalda, eftir að farið verður að kortleggja þær afleiðingar og það tjón sem þetta veður hefur valdið, að hlutast til um að gerðar verði ráðstafanir til þess að byggja upp raforkuinnviðina. Það vantar mikið upp á að þeir séu í lagi,“ segir Þórólfur í Morgunblaðinu í dag og bætti við að vinnsla í frystihúsi, sláturhúsi, mjólkursamlagi og steinullarverksmiðju hefði stöðvast vegna rafmagnsleysisins.
Þórdís Kolbrún Reykfjörð Gylfadóttir, iðnaðar- og nýsköpunarráðherra, segir við Morgunblaðið í dag að umbætur á dreifikerfi raforku séu aðkallandi og á döfinni. Óveðrið hafi þó verið óvenjulegt. „Það tók út sterkar línur sem hafa staðið af sér mörg óveður fram til þessa,“ segir hún og bætir við á öðrum stað: „Það er auðvitað algjörlega augljóst að raforku- og fjarskiptakerfi snýst um þjóðaröryggi.“