Steingrímur J. Sigfússon, forseti Alþingis, er sagður hafa veist að Halldóru Mogensen, þingflokksformanni Pírata, í vikunni með ókvæðisorðum. Vísir greinir frá þessu og þar segir Halldóra að Steingrímur hafi beðið hana afsökunar.

Í frétt Vísis segir:

„Hann hreytti út úr sér reiður mjög einhverju á þessa leið; hvernig er það eiginlega með þig manneskja, er ekki hægt að eiga við þig orðastað undir fjögur augu án þess að það leki út um allt? Ef þú ætlar að haga þér svona hef ég ekkert meira við þig að ræða.“

Tildrög þessa eru rakin í frétt Vísis en eins og alþjóð veit gekk mikið óveður yfir landið á þriðjudag. Skilningur þingmanna hafi verið að slíta ætti þingfundi klukkan 17 en Steingrímur hafi sagt við Halldóru í matsal Alþingis að útlit væri fyrir að þingfundur stæði lengur. Halldóra minntist á þessi orð forsetans þegar hún fór upp í pontu eftir umrætt samtal og virðist Steingrímur hafa verið ósáttur við það.

„Þetta var ekkert einkasamtal, margir sem heyrðu það sem forseti sagði. Við ákváðum að fara í fundarstjórn; um hvenær við fengjum að fara heim, meðal annars í ljósi þess að forsætisráðherra var búinn að setja status á Facebook-síðu sína og biðja fólk að vera heima,“ segir Halldóra í fréttinni og bætir við: „Hann öskraði á mig fyrir framan alla þarna í hliðarherberginu.“

Halldóra segir að Helga Vala Helgadóttir, þingmaður Samfylkingarinnar, hafi verið þarna líka. Halldóra segir einnig að Steingrímur hafi beðið hana afsökunar og hún hafi tekið það gott og gilt.