„Hvað haldiði að Píratar hefðu sagt ef eiginmaður eða eiginkona biskups Íslands hefði gengið fram með slíkum hætti í þinginu gegn öðrum trúfélögum?“ skrifar Björn Ingi Hrafnsson, ritstjóri Viljans, á Facebook-síðu sína, þar sem hann deilir nafnlausum pistli af vefriti sínu. Þar er Helgi Hrafn Gunnarsson, þingmaður Pírata, gagnrýndur harðlega fyrir tvískinnung og vanhæfni í málflutningi, fyrir að berjast á Alþingi gegn hagsmunum þjóðkirkjunnar á sama tíma og eiginkona hans er formaður Siðmenntar, sem er mjög stórt og öflugt lífskoðunarfélag.
Í pistlinum á Viljanum segir meðal annars:
Siðareglurnar eiga nefnilega ekki við Píratana sjálfa.
Þetta varð endanlega ljóst við umræður á Alþingi í gær, þar sem ljóst varð að Píratar telja ekki að vanhæfisreglur eigi heldur við um þá, þegar þingmaðurinn Helgi Hrafn Gunnarsson steig í pontu og lenti í miklu orðaskaki við forseta Alþingis vegna kirkjujarðasamfélagsins.
Helgi Hrafn, sem er þekktur fyrir að ráðast á Þjóðkirkjuna hvenær sem tækifæri sem gefst og jafnvel oftar, sagði samning ríkisins um kirkjujarðirnar vera „óheiðarlegan og til skammar að taka ætti hann til meðferðar með svo stuttum fyrirvara og svo skömmu fyrir jólafrí.“
Síðan bendir pistilhöfundur á að eiginkona Helga, Inga Auðbjörg Straumland, er formaður Siðmenntar og segir síðan:
Það þarf því ekki langskólanám í stjórnmála- eða stjórnsýslufræðum til að finna út að Helgi Hrafn er bullandi vanhæfur til að ræða þessi mál, hvað þá beita sér gegn umræddum samningum eða hafa áhyggjur af áhrifum þeirra á aðra trúarsöfnuði í landinu, svo notuð séu hans eigin orð.
En mun Helgi Hrafn átta sig á því?
Glætan.
Viljinn segir síðan að Píratar hafi litlar áhyggjur af spillingarmálum þar sem þeir sjálfir komast að kjötkötlunum enda hafi þeir verið duglegir við að þagga niður spillingarmál í borginni eftir að þeir komust þar í meirihlutasamstarf.