Fréttablaðið skýrir frá þessu. Fram kemur að Aðaldalur ehf. hafi í árslok 2009 keypt hluti í þremur jörðum með veiðiréttindi í Laxá í Aðaldal. Þetta voru jarðirnar Knútsstaður og Straumsnes í Aðaldælahreppi og Hólar í Laxárdal. Félagið keypti líka íbúðarhús á Lynghóli í Aðaldælahreppi. Síðan gerðist ekki meira í fasteigna- og jarðakaupum hjá félaginu fyrr en í september á þessu ári. Þá keypti félagið hluta af jörðinni Austurhaga í Aðaldælahreppi.
Aðaldalur er eins og fyrr segir í eigu Dylan Holding SA sem er skráð í Lúxemborg. Jóhannes Kristinsson, fjárfestir, er í forsvari Dylan Holding SA. Hann er kannski þekktastur fyrir aðild sína að Fons og Iceland Express á árum áður. Fréttablaðið segir að hann hafi verið sagður eigandi félagsins en því hafi einnig verið haldið fram í fréttum, þar á meða hjá Morgunblaðinu og Kjarnanum, að Jim Ratcliffe sé raunverulegur eigandi félagsins. Þessu vísaði Gísli Ásgeirsson, talsmaður Ratcliffe hér á landi, á bug í samtali við Fréttablaðið og sagði Ratcliffe ekki eiga Dylan Holding SA.
Fréttablaðið segir erfitt að segja til um hversu stóra hlutdeild í veiðiréttindum í Laxá í Aðaldal félagði Aðaldalur á núna. Ónafngreindur sérfræðingur, sem Fréttablaðið ræddi við, telur að félagið eigi 3-5 prósent af veiðiréttindunum.