Seðlabankinn tilkynnti í morgun að stýrivextir bankans yrðu lækkaðir um 0,25%. Vextirnir verða því 3,0% og hafa ekki verið lægri frá því að verðbólgumarkmið var tekið upp árið 2001.
Í Korni Íslandsbanka segir að lesa megi úr tikynningu Seðlabankans að um sé að ræða síðustu vaxtalækkunina í bili.
Stýrivextir hafa nú lækkað um 1,50% frá áramótum, þar af um 0,75% frá því nýr Seðlabankastjóri tók við um miðjan ágúst. Útlit er þó fyrir að þetta verði síðasta vaxtalækkunarskref bankans í bili. Spár höfðu ýmist hljóðað upp á óbreytta vexti eða lækkun og höfðum við spáð lækkun vaxta líkt og raunin varð.
Í yfirlýsingu peningastefnunefndar segir m.a.:
„Vextir bankans hafa verið lækkaðir um 1,5 prósentur frá því í vor og eiga áhrif þess enn eftir að koma fram að fullu. Lækkun vaxta hefur stutt við eftirspurn og miðað við spá bankans ætti núverandi vaxtastig að duga til að tryggja verðstöðugleika til meðallangs tíma og fulla nýtingu framleiðsluþátta.“
Lesa má úr tilkynningunni að allar líkur eru á að þetta sé síðasta vaxtalækkun bankans í bili, eða allt til loka ársins 2020
Ný þjóðhagsspá Seðlabankans, sem birt var í Peningamálum í morgun, gerir ráð fyrir versnandi hagvaxtarhorfum á síðari hluta þessa árs miðað við síðustu spá. Ástæðuna má fyrst og fremst rekja til verulegs samdráttar í vöruútflutningi á þriðja ársfjórðungi. Hagvöxtur hafi þó verið meiri á fyrri hluta árs en spáð var og er því gert ráð fyrir 0,2% hagvexti á árinu öllu líkt og spá gerði ráð fyrir í ágúst.