Bolli Héðinsson hagfræðingur, skrifar í Fréttablaðið í dag um ríkisstjórnarsamstarfið og áhersluatriði VG þar. Hann virðist ekki heillaður af þeim málum sem VG hyggst berjast fyrir á Alþingi:
„Ríkisstjórnin hyggst veikja Samkeppniseftirlitið á þann veg að eftirleiðis geti fyrirtæki metið sjálf hvort samkeppni milli þeirra sé næg …
– Samkeppniseftirlitið mun ekki fá að skjóta málum til dómstóla heldur munu fyrirtækin eiga síðasta orðið … (eins og þegar útgerðir láta eigin vigtun á afla gilda um það magn sem þær koma með að landi, ekki það sem hafnarvogin vigtaði. Nú vilja fleiri fyrirtæki fá að njóta sama sjálfdæmis.)
– Ríkisstjórnin hyggst lækka erfðafjárskatt …
– Ríkisstjórnin hyggst koma á fót þjóðarsjóði fyrir arðinn af auðlindum þjóðarinnar, en arðurinn af sjávarútvegsauðlindinni er ekki hafður með … (eins og ríkisstjórnin telji fiskimiðin ekki meðal eigna þjóðarinnar, sem henni beri að hafa neinn arð af.)
– Þjóðarsjóðinn á síðan að fela einkafyrirtækjum (á borð við Gamma) að ávaxta í stað Seðlabankans sem hefur boðist til að taka það að sér á svipaðan hátt og gert er í Noregi.”
Bolli nefnir síðan að VG hafi þegar náð orkupakka 3 í gegn:
„Pakka sem þau hefðu verið algjörlega mótfallin ef þau hefðu ekki verið í ríkisstjórn.“
Bolli gerir lítið úr árangri VG, það séu aðallega umhverfismál sem allir séu sammála um, en það sem á undan var talið upp stríði gegn stefnu VG:
„Á hátíðarstundum í flokksstarfi Vinstri grænna eru hins vegar talin upp afrek þeirra í ríkisstjórnarsamstarfinu. Upptalning VG á árangri er í besta falli almennar yfirlýsingar um náttúruvernd og loftslagsmál og eingöngu í málaflokkum sem nær allir eru sammála um. Ætla má að málefnin sem talin eru upp hér í byrjun stríddu gegn þeim grundvallarsjónarmiðum sem VG segist standa fyrir í orði kveðnu a.m.k.”
Þá minnist Bolli á Drífu Snædal, forseta ASÍ, sem sagði sig úr VG vegna þeirrar ákvörðunar forystunar að ganga til liðs við Sjálfstæðisflokkinn og Framsóknarflokkinn, sem hún líkti við ofbeldissamband og að éta skít vegna spillingar og skorts á trúverðugleika. Taldi hún daga VG talda:
„Með ákvörðuninni um stjórnarviðræður setti flokkinn niður, trúverðugleikinn laskaðist verulega og vinstrið á Íslandi mun eiga erfitt uppdráttar næstu árin og áratugina.“
Um þetta segir Bolli:
„Við myndun ríkisstjórnarinnar greindi núverandi forseti ASÍ, sem er fyrrverandi framámaður í VG, frá því hvert hún teldi að yrði hlutskipti VG í ríkisstjórninni. Svo virðist sem forspá hennar sé nú þegar orðin að áhrínsorðum.“
