„Þið ættuð sem fyrst að hrista af ykkur þessa hugmynd um tærleika, óskeikulleika, að þú sért alltaf pólitískt „woke“. Veröldin er ekki klippt og skorin. Það eru grá svæði og álitamál. Fólk sem gerir frábæra hluti hefur sína galla og fólkið sem þið eruð að berjast gegn kann að elska börnin sín og eiga ýmislegt sameiginlegt með ykkur. Eitt hættumerki sem ég sé meðal ungs fólks, sérstaklega í háskólum – og samfélagsmiðlarnir magna þetta upp – er að maður fær stundum á tilfinninguna að hugsunin sé: „Leiðin til að breyta samfélaginu er að dæma aðra eins hart og mögulegt er. Og það er nóg. Ef ég birti athugasemd á Twitter um hvernig þú gerðir eitthvað vitlaust eða notaðir rangt orð, þá get ég slakað á og klappað sjálfum mér á bakið. Sástu hvað ég var „woke“? Ég fletti ofan af þér. Best að horfa á sjónvarpið.“ – Þetta er ekki aktífismi. Þetta er ekki að stuðla að breytingum. Það er ólíklegt að það skili miklum árangri að kasta bara steinum. En það er mjög auðvelt.“
Ofangreind orð eru eftir Barack Obama Bandaríkjaforseta, úr ræðu sem hann hélt fyrir skemmstu. Þar varaði hann ungt fólk við dómhörku – á tíma samfélagsmiðla. Þórdís Kolbrún R. Gylfadóttir ráðherra notar þessi orð Obamas sem uppistöðu í grein sem hún skrifaði og birtist í Morgunblaðinu í gær.
Þetta er ágæt grein – hana má lesa hér að ofan og á vef Morgunblaðsins.
Woke er tískuorð dagsins í dag. Í sjónvarpsþættinum Kappsmáli var í haust kallað eftir íslensku heiti yfir þetta hugtak. Það fannst held ég ekki. Ekkert hefur allavega náð útbreiðslu. Í íslensku hefur reyndar lengi verið til orðið „meðvitaður“ sem fangar þetta nokkurn veginn.