Afgreiðsla tillögu um að veita auknu fjármagni til rannsókna á fjármálabrotum fór fram á Alþingi í dag, en málið hefur vakið nokkra athygli, þar sem umfang Samherjamálsins kallar á aukna fjárveitingu til rannsóknaraðila hins opinbera, skattrannsóknarstjóra og héraðssaksóknara. Var tillagan felld.

Smári McCarthy, þingmaður Pírata, vakti athygli á afstöðu Sigmundar Davíðs Gunnlaugssonar, formanns Miðflokksins, á Facebook í dag. Sagðist Smári hafa hlegið upphátt þegar honum varð ljós afstaða Sigmundar í málinu:

„Ég hló smá þegar þessi maður sat hjá við afgreiðslu tillögu um að veita auknu fjármagni til rannsókna á fjármálaafbrotum rétt í þessu. Ekki síst þar sem hann hefur varla sést síðan Samherjamálið kom upp.“

Birtir Smári síðan mynd af Sigmundi Davíð í viðtalinu fræga þegar hann sem forsætisráðherra, fékk hina alræmdu Wintris-spurningu, sem hann gat ómögulega svarað með sannleikanum.