Umboðsmaður borgarbúa gaf nýlega út tilmæli vegna framkvæmda Reykjavíkurborgar í miðbænum, þar sem því var beint til borgaryfirvalda að hafa þyrfti „raunverulegt“ og „skilvirkt“ samráð við hagsmunaaðila og framkvæmdaaðila með fundarhöldum áður en verk hefjast, en flestum er í fersku minni umkvartanir fyrirtækjaeigenda við Hverfisgötu sem hafa krafist tafarbóta frá borginni vegna framkvæmda við Hverfisgötu, sem sagðar eru fæla frá viðskiptavini með tilheyrandi afleiðingum á reksturinn.
Í hnotskurn beinir umboðsmaður þeim tilmælum til borgarinnar að láta viðkomandi vita um leið og eitthvað hefur verið ákveðið varðandi framkvæmdir, svo fyrirtækin geti gert ráðstafanir sem og að fullt samráð verði haft á öllum stigum máls.
Dagur B. Eggertsson, borgarstjóri, segir að tilmælin frá umboðsmanni borgarbúa muni nýtast vel:
„Þetta mun nýtast inn í vinnuna sem er í gangi,“
segir Dagur við Morgunblaðið í dag, þegar sé farin af stað vinna hjá umherfis -og skipulagssviði Reykjavíkurborgar og sviðið muni „skoða“ ummælin.
Þess má þó geta að tilmæli umboðsmannsins eru einmitt þau sömu og verslunareigendur og hagsmunaaðilar hafa bent borginni á síðan í maí að minnsta kosti.