„Stjórn Torgs hefur samþykkt ritstjórnarstefnu fyrir blaðið og miðla þess. Þar segir að stefna fjölmiðla félagsins sé að halda uppi borgaralegum viðhorfum, víðsýni og frjálslyndi. Frelsi sé gert hátt undir höfði og hag neytenda haldið á lofti. Stjórnvöldum á hverjum tíma sé veitt aðhald á öllum sviðum og sama gildi um dómstóla. Fréttablaðið og miðlar þess aðhyllist alþjóðlegt samstarf Íslendinga á breiðum vettvangi og horft sé til þess að dýpka slíkt samstarf til framtíðar.“
Þetta segir í leiðara Fréttablaðsins í dag. Hann er skrifaður af Jóni Þórissyni, nýjum ritstjóra blaðsins við hlið Davíðs Stefánssonar. Þetta er dálítið merkileg lesning, það er ekki algengt á Íslandi að fjölmiðlar setji sér slíka stefnuskrá. Það rifjast reyndar upp að Þjóðviljinn kallaði sig „málgagn sósíalisma og þjóðfrelsis“, ef ég man rétt.
En við sjáum þarna að Fréttablaðið hyggst halda uppi „borgaralegum viðhorfum“. Í samhengi stjórnmála á norðurhveli þýðir þetta að blaðið verður heldur til hægri á hinum pólitíska ás. Því er ætlað að „gera frelsi hátt undir höfði“, og síðast en ekki sýst „aðhyllast alþjóðlegt samstarf“, auk þess sem „horft sé til þess að dýpka slíkt samstarf til framtíðar“.
Út úr þessu má lesa að blaðið sé hlynnt veru Íslands í EES og Nató – og verði jafnvel fylgjandi því að Ísland gangi í ESB. Öðruvísi er varla hægt að skilja það?
Jón Þórisson hefur ekki mikla reynslu í blaðamennsku, hann er lögfræðingur, en sest nú í ritstjórastól útbreiddasta dagblaðs á Íslandi. Hann er jafnframt einn af eigendum blaðsins, en aðaleigandinn verður nú Helgi Magnússon, fjárfestir og viðskiptajöfur. Hann hefur verið talinn einn bakhjarl stjórnmálaflokksins Viðreisnar – tíminn á eftir að leiða í ljós hvort Viðreisn hefur þarna eignast fjölmiðil sem styður flokkinn og talar máli hans. Það getur reynst dýrmætt í stjórnmálabaráttunni.
Sjónvarpsstöðin Hringbraut hefur nú sameinast Fréttablaðinu og má því ætla að slagkraftur þessa fjölmiðlaveldis verði býsna mikill. Sameiningin ætti að styrkja Hringbraut býsna mikið, það er að mörgu leyti ágæt sjónvarpsstöð, en hefur verið nokkuð hornreka.
Jón Ásgeir Jóhannesson og Ingibjörg Pálmadóttir hverfa nú frá fjölmiðlarekstri. Þar er sögulegum kafla lokið í fjölmiðlasögunni. Baugsmálin svokölluðu gusu upp þegar Jón Ásgeir eignaðist Fréttablaðið og síðar Stöð 2. Þá reyndi Davíð Oddsson að setja hin sögufrægu fjölmiðlalög sem Ólafur Ragnar Grímsson neitaði að skrifa undir. Svo upplifði þjóðin fjármálabólu og hrun – og það hvernig Fréttablaðinu var beitt mjög eindregið fyrir vagn eigenda sinna. Það var ekki góður tími í sögu blaðsins. En þessar öldur hefur að mestu lægt – og síðustu árin hefur Fréttablaðið siglt nokkuð lygnan sjó hvað varðar efnistök og ritstjórnarstefnu.
En nú verður forvitnilegt að sjá hvert stefnir í þeim efnum.