Líkt og Eyjan hefur greint frá kom Ísland ekki sérlega vel út í skýrslu fjármálaaðgerðarhópi ríkja um aðgerðir gegn peningaþvætti og fjármögnun hryðjuverka, þar sem 51 aðfinnsla var gerð við stöðu mála hér á landi í þeim efnum. Enn á eftir að leysa úr sex þeirra og keppa stjórnvöld nú við tímann til að laga þau atriði, svo Ísland festist ekki á svörtum lista með óæskilegum þjóðum, sem mun gera bönkum á Íslandi erfitt fyrir í alþjóðlegum viðskiptum.
Sjá nánar: Peningaþvætti í spilakössum á Íslandi að stórum hluta á ábyrgð ríkisins – Yfirvöld grípa í taumana
Tollgæslan í Reykjavík hefur ráðið til sín sérþjálfaðan hund af labrador kyni til að nota í baráttunni gegn peningaþvætti. Morgunblaðið greinir frá þessu í dag. Hundurinn hefur verið þjálfaður til að finna lykt af peningaseðlum, en hafði áður verið notaður til að finna fíkniefni og reyndist vel í þeirri baráttu.
Umsjón með þjálfun hundsins hefur Steinar Gunnarsson, lögreglufulltrúi á Sauðárkróki, en þar er starfrækt starfsstöð sem sinnir þjálfun hunda í löggæslu.
„Lyktin af peningaseðlum fer ekkert á milli mála. Við vinnum með hundunum í nokkur misseri og við skipulagða þjálfun læra þeir fljótt hvar seðla er að finna, en þeir þurfa þá að vera í búntum og þar með allvænar upphæðir. Í brotastarfsemi er reiðufé oft haft um hönd og þá fjármunir, sem gjarnan eru faldir vandlega, þarf að finna vegna rannsóknar mála og til að stöðva skipulagða glæpastarfsemi. Í þeim efnum munu hundarnir koma í góðar þarfir,“
segir Steinar við Morgunblaðið og nefnir að þjálfunin sé ekki flókin sem slík. Þegar sé einn hundur tilbúinn úr þjálfun, en von sé á tveimur í viðbót:
„Menn hafa talað um að þjálfa hunda í leit að skotvopnum og lífsýnum. Það eru endalausir möguleikar til notkunar á þessum skepnum.“