Þær voru ansi skrítnar vangavelturnar sem birtust í Morgunblaðinu í dag – soðnar upp úr fyrirlestri Marc Lanteigne, dósents í stjórnmálafræði við Háskólann í Tromsö. Fyrirlesturinn var fluttur hér við Háskóla Íslands og þar var því haldið fram að Íslendingar þyrftu að velja milli Bandaríkjanna og Kína. Þetta var orðað með þessum hætti í fréttinni:
„Marc Lanteigne, dósent í stjórnmálafræði við Háskólann í Tromsö, fjallaði um tollastríð Kína og Bandaríkjanna í fyrirlestri við Háskóla Íslands. Stríðið geti haft víðtækar efnahagslegar afleiðingar. Íslendingar hafi ekki mikinn tíma til stefnu til að velja hvoru stórveldinu þeir fylgi að málum í efnahagslegu tilliti.“
Einnig var vitnað til Baldurs Þórhallssonar prófessors:
„Baldur Þórhallsson, prófessor í stjórnmálafræði við Háskóla Íslands, segir Íslendinga þurfa að endurmeta utanríkisstefnuna. Út frá smáríkjafræðum sé mikilvægt að Ísland hafi tryggan skjólsveitanda.“
Nú getur mönnum varla verði alvara með því að ræða um að Ísland gæti skipað sér í flokk með einræðisríkinu Kína, þótt á einhverjum sviðum megi komast að því að slíkt sé efnahagslega hagkvæmt. Þess er líka að gæta að Kína er hinum megin á hnettinum – þótt Kínastjórn reyni að þenja út sitt Belti og sína Braut um alla veröldina.
Ísland hefur líka sinn stað í veröldinni sem varla er að fara að breytast. Við erum aðilar að Evrópska efnahagssvæðinu, þar tilheyrum við risastórum markaði og í gegnum þessa aðild tökum við upp alls kyns regluverk. Sem þjóð fylgjum við líka mestanpart evrópskum gildum um lýðræði og mannréttindi.
Síðan erum við í varnarbandalagi með vestrænum þjóðum í Nató. Þar ríkir vissulega ákveðin tortryggini vegna framgangs Bandaríkjastjórnar sem hefur alla tíð verið leiðandi í bandalaginu. Það er jafnvel rætt um að Donald Trump ógni alþjóðakerfinu sem Bandaríkin voru fremst ríkja í að byggja upp eftir stríð. En Trump verður varla eilífur í embætti – og af því leiðir tæplega að Íslendingar fari að leita á náðir Kínverja sem „skjólveitanda.“.
Þó má geta þess í framhjáhlaupi að þegar Össur Skarphéðinsson var utanríkisráðherra og reyndi af öllum mætti að koma Íslandi inn í Evrópusambandið, þá tókst það ekki, heldur endaði hann uppi með fríverslunarsamning við Kína.