Brynjar Níelsson, þingmaður Sjálfstæðisflokksins, er launahæstur þeirra þingmanna sem ekki eru ráðherrar eða formenn flokka. Mánaðarlaun hans samkvæmt vefsíðu Alþingis fyrir ágúst mánuð voru rúmar 1.3 milljónir.
Þar af nam þingfarakaup um ellefuhundruð þúsund krónum, en Brynjar fær greiddar álagsgreiðslur sem 2. varaforseti Alþingis (rúmar 165 þúsund krónur) og sem 2. varaformaður efnahags- og viðskiptanefndar, en fyrir það fær Brynjar 55 þúsund krónur aukreitis sem dregur hann upp í efsta sætið.
Þá fær Brynjar, líkt og aðrir þingmenn, greiddan fastan ferðakostnað í kjördæmi (30 þúsund) og starfskostnað (40 þúsund).
Þá eru ótalin laun Brynjars vegna reksturs eigin lögmannsstofu og stundakennslu hans í HÍ, sem hann getur um í hagsmunaskrá.
Launagreiðslur Alþingis til Brynjars voru alls tæpar 16 milljónir árið 2018.
Laun flokksformanna sem ekki eru ráðherrar eru um 1.6 milljónir á mánuði, og laun forseta Alþingis, Steingríms J. Sigfússonar, eru um 1.8 milljónir á mánuði.
Alþingi greiðir þingmannahluta launa ráðherra, en viðkomandi ráðuneyti greiðir ráðherrahluta launa þeirra.
Í lögum um þingfararkaup er kveðið á um að þingmenn sem gegna tilteknum embættum skuli fá fastar viðbótargreiðslur (álagsgreiðslur) sem reiknast sem prósenta af föstum launum. Þetta gildir um þá þingmenn sem gegna störfum varaforseta, formanna þingflokka og nefndarformanna, en þeir fá greitt 15% álag á föst laun. Jafnframt fær 1. varaformaður nefndar 10% álag á föst laun og 2. varaformaður fær 5% álag. Þá fær formaður flokks sem ekki er ráðherra greitt 50% álag á laun. Enginn, að undanskildum varaforsetum Alþingis, getur fengið nema eina álagsgreiðslu.
