„Það er eitthvað að. Stjórnsýslan er of þung. Við erum með fasteignaskatta sem eru síhækkandi ekki prósentan heldur krónutalan vegna þess að fasteignamat hækkar úr öllu valdi þannig að það er eitthvað að. Það er eitthvað sem þarf að laga.”
Þetta segir Hildur Björnsdóttir, borgarfulltrúi Sjálfstæðisflokksins, í útvarpsþættinum Sprengisandi í morgun en þar voru meðal annars rædd skipulagsmálin í borginni. Hildur segir samráðsleysi sem rekstraraðilar í Miðborginni hafa þurft að mæta frá borgaryfirvalda vera gagnrýnivert. Þá undirstrikar hún mikilvægi umræða um framkvæmdir í borginni og að þurfi að draga af þeim lærdóm. „Mér finnst vanta einhvern veginn auðmýktina í samtalið milli borgarinnar og rekstraraðila, segir Hildur.
„Það hefur verið svolítið mikið skilningsleysi, rekstraraðilar hafa mætt hroka frá borgaryfirvöldum. Þetta er eitthvað sem þarf að laga, við náum engum árangri með svona pólaríseraðri hrokafullri orðræðu.“
Hildur segir að eitt af stóru vandamálunum Miðborgarinnar séu kvaðir sem borgin setti á nýbyggingar þess efnis að nýbyggingar þyrftu að gera ráð fyrir verslunarrými á neðstu hæð. Hildur segir að kvaðirnar séu hrópandi ósamræmi við þróunina sem sé að eiga sér stað erlendis.
Hildur segir að tóm verslunarrými skapi leiðinlegt yfirbragð. Þau séu skilaboð um að rekstur og verslun í Miðborginni gangi illa. Að sögn hennar sýnir þetta að borgaryfirvöld séu ekki að kynna sér þróunina í öðrum löndum nægilega vel. „Borgir þurfa að vera vakandi fyrir breytingum á tímum örra tæknibreytinga,“ segir hún.
„Ég er miklu hrifnari af þessari þróun inni í hverfum að við fjölgum verslunarrýmum þar og aukum við hverfisverslun og þessa sjálfbærni hverfanna svo þú þurfir ekki alltaf að leita svona langt yfir skammt en ég tel að þetta hafi verið mistök í Miðborginni,“ segir Hildur.
