Ragnheiður Elín Árnadóttir, fyrrverandi ráðherra, fékk 8,7 milljónir króna fyrir skýrslu um stefnu norrænna stjórnvalda í ferðamálum. Fréttablaðið greinir frá þessu í dag og vísar í svar atvinnuvega- og nýsköpunarráðuneytisins við fyrirspurn blaðsins.
Kostnaður við skýrsluna var 12,2 milljónir króna og var hún greidd af norrænu ráðherranefndinni. Starfsemi nefndarinnar er fjármögnuð með framlögum frá norrænum ríkjum, Íslandi þar á meðal.
Að sögn Fréttablaðsins fékk Berglind Hafsteinsdóttir, forstöðumaður hjá Nýsköpunarmiðstöð Íslands, eina milljón króna í sinn hlut en Berglind aðstoðaði Ragnheiði við skýrsluna. Þær ferðuðust um Norðurlöndin við gerð skýrslunnar og hittu meðal annars ráðherra og sérfræðinga.