Fréttablaðið skýrir frá þessu í dag. Fram kemur að vaxtaþróunin á erlendum mörkuðum, þar sem víða eru neikvæðir vextir í dag, geti dregið úr verðbólgu hér á landi og veitt aukið svigrúm fyrir vaxtalækkanir. Versnandi horfur eru í heimshagkerfinu vegna vísbendinga um framleiðsluslaka í Evrópu og vegna spennu í samskiptum Bandaríkjanna og Kína.
Blaðið hefur eftir Kristrúnu Frostadóttur, aðalhagfræðingi Kviku banka, að sama þróun hafi verið upp úr 2014 og segja megi að þá höfum við flutt inn lága verðbólgu helstu viðskiptaríkjanna. Ef staðan breytist ekki gæti fyrirséður samdráttur á erlendum mörkuðum haldið niðri verðbólgu hér á landi og aukið svigrúm til vaxtalækkana.
Frá því í maí hefur Seðlabankinn lækkað vexti úr 4,5 prósentum í 3,75 prósent en næsti vaxtaákvörðunardagur er 28. ágúst.
„Hér eru enn hærri vextir, og þó við séum að vinna okkur út úr ferðaþjónustusjokki eru margir mælikvarðar mjög heilbrigðir, meðal annars hvað varðar skuldsetningu. Margir hafa vonast eftir minnkandi vaxtamun en ef vextir lækka erlendis í svipuðum takti og hér heima helst munurinn óbreyttur. Það gæti laðað að fjármagn, stutt við krónuna, og þar með haldið enn aftur af verðbólgu.“
Er haft eftir Kristrúnu.
Agnar Tómas Möller, forstöðumaður hjá Júpíter, sagði tímaspursmál hvenær erlent fjármagni fari að streyma til landsins:
„Ef verðbólga og verðbólguvæntingar halda áfram að lækka og við höldum áfram að semja skynsamlega á vinnumarkaði er engin ástæða til að ætla annað en að langtímavextir geti lækkað hér verulega, líkt og hefur gerst undanfarin ár í öðrum litlum sjálfstæðum myntsvæðum eins og Nýja-Sjálandi og Ísrael, þar sem langtímavextir eru í dag um 1% og hafa lækkað gríðarlega undanfarinn áratug.“