Angela Merkel, kanslari Þýskalands, verður sérstakur gestur árlegs sumarfundar forsætisráðherra Norðurlandanna sem fram fer í næstu viku. Í tengslum við leiðtogafundinn mun Katrín Jakobsdóttir forsætisráðherra eiga nokkra tvíhliða fundi, meðal annars með Þýskalandskanslara.
Þetta kemur fram í tilkynningu frá stjórnvöldum.
Á mánudagskvöld mun Katrín taka á móti Merkel á Þingvöllum og í kjölfarið verður haldinn blaðamannafundur þar sem leiðtogarnir flytja stutt ávörp og svara spurningum. Þá mun Katrín funda með Antti Rinne, forsætisráðherra Finnlands, á mánudag og heimsækja Hellisheiðarvirkjun með Stefan Löfven, forsætisráðherra Svíþjóðar. Á þriðjudag verður svo sameiginlegur fundur forsætisráðherranna og blaðamannafundur í kjölfarið.