Halldór Benjamín Þorbergsson, framkvæmdastjóri Samtaka atvinnulífsins, telur að styrking krónunnar gæti styrkt grundvöll lífskjarasamninganna þar sem hún stuðlar að meiri verðstöðugleika og auknum kaupmætti. Þetta kemur fram í umfjöllun í Morgunblaðinu í dag.
Gengi krónunnar gaf eftir í kjölfar gjaldþrots WOW air í mars en hefur verið á uppleið undanfarið. Búast má við hjaðnandi verðbólgu á næstunni sem styrkir lífskjarasamningana og hefur jákvæð áhrif á kaupmátt, þar sem verðlag helst stöðugt og þær launahækkanir sem samið hefur verið um skila sér betur til launamanna.
Samtök atvinnulífsins kalla eftir lækkun stýrivaxta hjá Seðlabankanum en þau telja skilyrði til slíks ef verðbólgumarkmið nást. Búist sé við slaka í efnahagslífinu á næstunni með vaxandi atvinnuleysi og engum hagvexti. Því ættu að vera skilyrði til vaxtalækkana en þær geta stuðlað að lækkandi húsaleigu.