Gunnar Bragi Sveinsson, þingmaður Miðflokksins, var í áliti forsætisnefndar um Klaustursmálið talinn hafa gerst sekur um brot gegn siðareglum þingmanna.
Meðal þeirra ummæla sem brutu gegn reglunum var þegar hann kallaði menntamálaráðherra, Lilju Alfreðsdóttur, tík. Gunnar Bragi telur ekkert að orðanotkuninni, orðið sem notað til að lýsa skoðunum og teldist ekki ósiðlegt. Jafnframt sakar hann Lilju um að hafa notað málið í pólitískum tilgangi og hafa sjálf í því samhengi misnotað orðið „ofbeldi“
„Hjólum í helvítis tíkina“
Í andsvari sínu til forsætisnefndar segir Gunnar Bragi að ummælin hafi átt sér rætur að rekja í vonbrigðum og reiði vegna persónulegs máls. Það sé hins vegar al íslenskt að nota slíkt orð „og hafa ekki til þessa talist ósiðleg en klárlega skammarorð.“
Gunnar veltir fyrir sér hvort minnihluti siðanefndar hefði komist að sömu niðurstöðu ef um karlmann hefði verið að ræða sem kallaður hefði verið orðum á borð við hundur, asni, drullusokkur, gunga og drusla.
„Á enskri tungu er orðið [tík] m.a. notað yfir óforskammaða manneskju“
Hann segir að hvort sem fólki líki það betur eða verr þá séu þessi orð sem og mörg önnur notuð til að lýsa skoðunum.
Hann spyr svo hvort nefndin hafi kynnt sér orðfæri þingmanna í þingsal þar sem orð á borð við gunga og drusla hafi verið látin falla.
„En þrátt fyrir að menntamálaráðherra hafi misnotað orðið ofbeldi í pólitískum tilgangi þá er menntamálaráðherra fyrst og fremst stjórnmálamaður sem nýtir sín tækifæri en er ágætis manneskja“
Varðandi ummæli hans um Albertínu Friðbjörgu Elíasdóttur, þingmann, segir hann að þar hafi hann virkilega verið að ræða erfiða lífsreynslu, þó svo að notkun hans á orðinu nauðgun hafi verið yfir strikið.
„Það er hreint með ólíkindum að nefndin telji að frásögn af því sem verður ekki skýrt með orðum en sem lýsingu á áreiti sé brot á siðareglum. Er nefndin að hvetja til þess að slík mál séu ekki rædd af þingmönnum við vini eða kunningja ef tilefni er til?“
Jafnframt sakar hann siðanefnd og pólitíska andstæðinga um að reka málið sem hluta af pólitískri vegferð.