Tryggingastofnun ríkisins hefur tilkynnt að leiðrétt verði lækkun á krónu á móti krónu skerðingu í ágústlok. Þetta kemur fram í frétt á vef Öryrkjabandalagsins. Um þetta segir meðal annars í fréttinni:
„Alþingi samþykkti eins og kunnugt er, frumvarp félags og barnamálaráðherra um lækkun skerðinga bóta vegna annara tekna lífeyrisþega. Breytingin var afturvirk, og gildir frá 1. janúar 2019. Tryggingastofnun hefur nú tilkynnt að í síðustu viku ágústmánaðar, munu þeir sem rétt eiga á hækkun greiðslna vegna fyrstu átta mánaða ársins, fá þær greiðslur.“
Tekjuviðmið breytast þannig að 65% af skattskyldum tekjum örorku- og endurhæfingarlífeyrisþega hafa nú áhrif á útreikninginn í stað 100% áður. Aldurstengd örorkuuppbót hefur nú 50% vægi í stað 100% áður. Bætur samkvæmt lögum um almannatryggingar og lögum um félagslega aðstoð, aðrar en aldurstengd örorkuuppbót, hafa áfram 100% vægi.“
Öryrkjabandalagið segir enn fremur að skerðingin sé enn til staðar, bara minni en áður. Hvetur bandalagið stjórnvöld til að stíga skrefið til fulls og afnema skerðinguna að fullu.
