Teodoro L. Locsin utanríkisráðherra Filippseyja segir að ályktun Íslands, um rannsókn á mannréttindabrotum á Filippseyjum, sem samþykkt var í mannréttindaráði Sameinuðu þjóðanna, sé varla marktæk. Þannig hafi í raun minnihluti þeirra ríkja sem eiga sæti í ráðinu greitt atkvæði með tillögunni. Þetta kemur fram í yfirlýsingu sem stjórnvöld á Filippseyjum hafa sent frá sér.
Átján ríki greiddu atkvæði með tillögunni, fjórtán voru á móti en fjarverandi voru fulltrúar fimmtán ríkja. Lönd eins og Bretland, Ástralía, Danmörk, Spánn, Austurríki, Króatía og Tékkland studdu Ísland, en Kína, Ungverjaland, Indland og Saudi Arabía, auk Filippseyja, voru andvíg tillögunni.
Fjölmiðlar á Filippseyjum hafa brugðist ókvæða við og haft var eftir Severo Caturo, varaformanni forsetaskipaðrar mannréttindanefndar Filippseyja að ályktun Íslands brjóti gegn því góða samstarfi sem landsmenn hafi átt við fulltrúa Sameinuðu þjóðanna varðandi mannréttindi. Ályktun Íslands geri meðal annars ráð fyrir að fulltrúar Sameinuðu þjóðanna verði sendir til Filippseyja til að rannsaka dauða fjölmargra sem tengjast eiturlyfjahringum í landinu.
Caturo segir að rannsókn á þessum dauðsföllum og meintum mannréttindabrotum sé fullnægjandi og allar upplýsingar séu til um hvert tilvik. Ef stjórnvöld á Filippseyjum þurfi aðstoð við frekari rannsókn, þá verði óskað eftir henni. Það hafi ekki þurft til þessa og ályktun Íslands gangi þvert á þá stefnu sem yfirvöld hafi mótað um „uppbyggilega umræðu“ við fulltrúa Sameinuðu þjóðanna, eins og Caturo orðar það. Hann bendir á að engar einstakar kvartanir hafi formlega verið lagðar fram hjá viðkomandi nefnd mannréttindaráðsins, og í því ljósi verði ályktunin enn undarlegri. Ekki sé hægt að meta stöðu mannréttinda á Filippseyjum út frá fjölmiðlaumfjöllun einni, heldur verði að halda sig við staðreyndir.