Salvör Nordal, umboðsmaður barna, segir það hafa komið sér á óvart að íslensk stjórnvöld sendi börn til Grikklands sem hafa óskað hér eftir hæli. Til stendur nú að senda tvær afganskar fjölskyldur, þar af fjögur börn, til Grikklands þar sem þau hafa fengið alþjóðlega vernd. Evrópuráðið og flóttamannastofnun Sameinuðu þjóðanna hafa bent á óviðunandi aðstæður flóttamanna í Grikklandi.

Í samtali við Morgunvaktina á Rás 1 spyr Salvör hvort það sé forsvaranlegt að senda börn þangað þegar búið er að veita þeim dvalarleyfi á Íslandi. „Mér finnst eðlilegt að það sé gerð sérstök skoðun á því. Mig langar að heyra ástæðuna og rökin,“ segir Salvör og bætir við að sé fleira sem þurfi að skoða í þessum málum.

„Það er þegar börn hafa verið hér í einhvern tíma. Þau eru hérna mánuðum saman, þau ná að festa rætur og líður vel í skóla, þá er mjög sársaukafullt að senda þau til baka. Þannig að við erum líka að hugsa um málshraðann og slíka hluta sem er vert að taka upp.“

Salvör hefur óskað eftir fundi með dómsmálaráðherra og mun hann fara fram í þessari viku.