„Ég er á móti þessu frumvarpi. Ég er á móti því að innleiða hugtakið þungunarrof sem mér finnst fegra það sem raunverulega á sér stað, að það verið að deyða líf. Ég tek undir álit biskups Íslands í þessum efnum. Ég er á móti því að leyfa fóstureyðingu þegar kona er gengin hálfa meðgöngu og ég er á móti þessu frumvarpi af trúarlegum og siðferðilegum ástæðum,“ segir Birgir Þórarinsson, þingmaður Miðflokksins, en hann deildi hart við Þórhildi Sunnu Ævarsdóttur, þingmann Pírata, í þættinum Vikulokin á Rás 1, um frumvarp til laga um þungunarrof sem liggur fyrir Alþingi. Atkvæðagreiðslu um frumvarpið hefur verið frestað þar til í næstu viku.
Birgi var mikið niðri fyrir og var mjög ósáttur við málflutning Halldóru Mogensen, þingmanns Pírata og formanns Velferðarnefndar, og málflutning Þórhildar Sunnu:
„Þegar spurt var um rétt feðra og rétt ófæddra barna í þessu máli þá svaraði svaraði Þórhildur að feðrum kæmi þetta ekki við. Ég minni á að Þórhildur er formaður laga- og mannréttindanefndar Evrópuráðsins – hvar eru þá mannréttindi feðra í þessu máli?“
Þá er Birgir mjög ósáttur við að gert hafi verið lítið úr viðhorfum þeirra sem vilja að trúarleg rök hafi vægi í málinu:
„Það var gert lítið úr skoðunum þeirra og það var flissað að okkur í þingsal þegar menn fór að ræða um trúarhugtakið“
Þórhildur Sunna benti Birgi á að hún væri menntuð í mannréttindalögfræði og allir helstu mannréttindasáttmálar heims væru ósammála því að sæðisgjafar hafi einhvern ákvörðunarrétt yfir þungun kvenna:
„Þetta hefur ítrekað komið fram í dómum Mannréttindadómstóls Evrópu þegar karla vilja þvinga konur til að ganga með börn sem þær vilja ekki ganga með.“