Brynjar Níelsson, þingmaður Sjálfstæðisflokksins, segir að þegar menn fari yfir strikið þá biðjist flestir afsökunar og málinu lýkur þar. Brynjar, sem er 2, varaforseti Alþingis, segir í færslu á Facebook í morgun að löggjafarsamkundan sé ekki eins og hver annar vinnustaður með forstjóra sem ræður fólk og rekur. „Jafnframt að það sé ekki svo að einstaka þingmenn ákveði hvaða aðrir þingmenn starfi með þeim við löggjafarstörf. Og það eigi ekki að koma öðrum á óvart að kjörnir þingmenn mæti í þinghúsið til starfa án sérstakra tilkynninga fyrirfram, þótt þeir hafi verið einhvern tíma leiðinlegir og dónalegir,“ segir Brynjar og bætir við:

„Þá væri talsverðar líkur á að þinghúsið væri meira og minna mannlaust. Mér finnst ekkert gaman einum í vinnunni.“

Það liggur fyrir að Brynjar er að vísa til endurkomu Gunnars Braga Sveinssonar og Bergþórs Ólasonar, þingmanna Miðflokksins, á Alþingi í gær. Margir þingmenn lýstu andrúmsloftinu sem þrungnu og áttu þingflokksformenn hálftímalangan fund um endurkomu þeirra í gær. Inga Sæland, formaður Flokks fólksins, talaði þetta sem ofbeldishegðun og sagði Lilja Alfreðsdóttir menntamálaráðherra að hún hefði ekki áttað sig á að þeir væru komnir aftur úr leyfi fyrr en hún sá þá úr sætinu sínu í þingsal. Líkt og greint var frá í gær átti hún í orðaskiptum við Gunnar Braga áður en hún yfirgaf þingsalinn.

Sjá einnig: Hverju hvíslaði Lilja að Gunnari Braga?

Brynjar segir í athugasemd við færslu sína að orðræða á mörgum öðrum þingum erlendis um samþingmenn sé oft miklu dónalegri án nokkurra afsagna, sumstaðar sláist þingmenn innbyrðis. „Hef ekki orðið var við afsagnir þar nema menn hafi beinlínis brotið einhverjar reglur.“

Hann segir svo:

„Menn eru oft að fara yfir strikið, bæði hér og erlendis. Þegar það gerist biðjast flestir afsökunar og málinu lýkur þar.“