Inga Sæland segist vera hætt sem gjaldkeri Flokks fólksins en viðurkennir að sonur hennar sé fastur starfsmaður hjá flokknum. Hún hafi hins vegar ekki verið sú sem réði hann. Þetta kemur fram í viðtali mbl.is við Ingu í dag.
Eins og við greindum frá í morgun birti Karl Gauti Hjaltason grein í Morgunblaðinu í dag þar sem hann gagnrýnir fjármál Flokks fólksins. Benti hann á að Inga væri prókúruhafi flokksins sem væri óeðlilegt og skyldmenni hennar sinnti launuðum störfum fyrir flokkinn. Karl Gauti var rekinn úr Flokki fólksins í kjölfar Klaustursupptökunnar og situr hann nú á þingi sem óháður þingmaður. Karl Gauti viðhafði ekki klámfengið eða ruddalegt orðbragð um konur á upptökunni en gagnrýndi hins vegar opinskátt formann sinn, Ingu Sæland.
Inga segir við mbl.is: „Það er alstaðar fólk sem er að grafa undan okkur og skemma fyrir okkur. Við verðum bara að standa af okkur svona holskeflu.“ Segir hún að framganga Karls Gauti einkennist af hefnigirni.