Ef ég hefði fari á fund blóðugs harðstjóra og lýst því yfir að tími minn með honum væri stoltasta stund lífs míns, þá þætti ég varla góður heimildarmaður um framferði þessa sama harðstjóra.

En þetta er tilfellið með Vanessu Beeley, breskan bloggara, sem var gestur á fundi í Safnahúsinu í dag. Fundarboðandi var Ögmundur Jónasson.

Hér er tvít frá Beeley eftir að hún hitti Bashir al Assad forseta Sýrlands fyrir hálfu ári. Hún ræður sér ekki fyrir stolti.

Markmiðið er að halda því fram að allir sem beygja sig undir vald Assads séu hryðjuverkamenn og þar af leiðandi algjörlega ómarktækir. Meginatriðið í málflutningi Beeleys er að að Hvítu hjálmarnir, hjálparsveitirnar sem hafa starfað á vettvangi í stríðinu í Sýrlandi, séu í raun hryðjuverkasamtök. Mikið af fréttum sem berast af grimmdar- og óhæfuverkum í Sýrlandi kemur frá þessum samtökum og skyldum aðilum. Sýrlandsstjórn og bandamenn þeirra Rússar hafa gengið mjög langt í áróðri sínum gegn þessum samtökum. Skýringin er einföld: Ef hægt er að kasta rýrð á þær fáu heimildir sem eru á vettvangi í stríðinu, þá vitum við í rauninni ekki neitt lengur – hugsið ykkur Vietnamstríðið þar sem allt sem kemur ekki beinlínis frá stjórnvöldum er afgreitt sem kommúnistaáróður (það var reynt!). Þessi áróðurs- og samsæriskenningaherferð er útskýrð í grein sem birtist í Guardian fyrir fáum mánuðum. Þar er áróðrinum sem kemur frá Rússlandi líkt við verksmiðju.

Málflutningi Beeleys er aðallega dreift í gegnum vef sem nefnist 21st Century Wire. Hún er  aðstoðarritstjóri. Á vefnum birtast meðal annars greinar þar sem er hæðst að loftslagsvísindum og svo eru fréttaskýringar um efni eins og Hitler hafi flutt til Argentínu eftir stríðið. Stofnandi 21st Century Wire, Patrick Henningsen, hefur ferðast með Beeley til Sýrlands. Þau eru bæði aufúsugestir á rússnesku sjónvarpsstöðinni RT. Henningsen hefur líka starfað með öfgahægrimanninum Alex Jones á vefnum Infowars.

Þetta er semsagt heldur sérstæður félagsskapur. Í einni frásögn af fundinum í dag kemur fram að Katrín Jakobsdóttir forsætisráðherra hafi verið meðal gesta. Þessi Facebook-færsla er reyndar eina heimildin um það. Hvernig ætli Katrínu hafi fundist fundurinn – hafi hún verið þar?

Í þessu sambandi má benda á nýja skýrslu rannsóknarnefndar Sameinuðu þjóðanna um ástandið í Sýrlandi.