Stjórnskipunar- og eftirlitsnefnd hefur samþykkt beiðni Óla Björns Kárasonar um að fundur nefndarinnar vegna skipunar í sendiherrastöður verði opinn. Í síðustu viku samþykkti nefndin tillögur Helgu Völu Helgadóttur, formanns nefndarinnar, um kalla Bjarna Benediktsson, Guðlaug Þór Þórðarson, Sigmund Davíð Gunnlaugsson og Gunnar Braga Sveinsson á fund nefndarinnar vegna ummæla á Klaustursupptökunum frægu um meinta sendiherrastöðu fyrir Gunnar Braga.
Sjá einnig: Leyniupptaka:Gunnar Bragi skipaði Árna Þór sendiherra til að draga athygli frá Geir Haarde
Í reglum um opna fundi fastanefnda Alþingis sem sendir eru út í sjónvarpi og á vef Alþingis, segir að formanni viðkomandi nefndar beri að leita eftir því með hæfilegum fyrirvara að gestur komi á opinn fund og gera honum grein fyrir efni fundarins. Þá skulu fjölmiðlar „eiga þess kost að láta fulltrúa sína fylgjast með opnum fundi. Jafnframt skal fundurinn opinn almenningi eftir því sem húsrúm leyfir.“ Ljósvakamiðlum er heimilt að hafa beinar útsendingar frá fundum nefnda sem eru opnir.
Ekki liggur fyrir hvenær fundurinn verður haldinn.