„Bæjarfulltrúar Miðflokksins í Suðurkjördæmi harma þau niðrandi ummæli sem þingmenn Miðflokksins létu falla um samborgara sína og samstarfsfólk sitt þann 20. nóvember síðastliðinn á Klaustur Bar í Reykjavík og náðust á hljóðupptöku.“
Þetta segir í tilkynningu frá bæjarfulltrúum Miðflokksins í Suðurkjördæmi. Í henni vonast fulltrúarnir að þingflokkurinn komist að „ásættanlegri niðurstöðu“ á fundi sínum í dag fyrir almenning, varðandi áframhaldandi þingmennsku þeirra sem í hlut áttu:
„Að öðrum kosti óskum við eftir flokkráðsfundi þar sem félagar Miðflokksins taka ákvörðun um framhaldið.“
Undir yfirlýsinguna skrifa Hallfríður G. Hólmgrímsdóttir í Grindavík, Margrét Þórarinsdóttir í Reykjanesbæ og Tómas Ellert Tómasson í Árborg, sem er eini Miðflokksmaðurinn sem er í meirihluta í sveitastjórn á landinu öllu.
Tómas Ellert sagðist í samtali við Eyjuna ekki vilja tjá sig meðan þingflokksfundur Miðflokksins stæði yfir. Aðspurður hvað hann teldi ásættanlega niðurstöðu, sagðist hann hafa búist við þeirri spurningu, en vildi bíða með að svara því þangað til eftir fundinn.
Í orðalaginu má greina hótun um að ef þingflokksfundur Miðflokksins leiði ekki til afsagna, verði málið tekið upp á flokksráðsfundi.
Yfirlýsing bæjarfulltrúa Miðflokksins í Suðurkjördæmi
Bæjarfulltrúar Miðflokksins í Suðurkjördæmi harma þau niðrandi ummæli sem þingmenn Miðflokksins létu falla um samborgara sína og samstarfsfólk sitt þann 20. nóvember síðastliðinn á Klaustur Bar í Reykjavík og náðust á hljóðupptöku.
Við vonum að þingflokkur Miðflokksins komist að ásættanlegri niðurstöðu á fundi sínum í dag fyrir almenning varðandi áframhaldandi þingmennsku þeirra þingmanna sem þarna áttu hlut að máli. Að öðrum kosti óskum við eftir flokkráðsfundi þar sem félagar Miðflokksins taka ákvörðun um framhaldið.
Bæjarfulltrúar Miðflokksins í Suðurkjördæmi
Hallfríður G. Hólmgrímsdóttir – Grindavík
Margrét Þórarinsdóttir – Reykjanesbæ
Tómas Ellert Tómasson – Svf. Árborg
