Gústaf Níelsson, sem skipa átti sem varamann í Mannréttindaráð Reykjavíkurborgar fyrir Framsókn og flugvallavini árið 2015, en hætt var við vegna umdeildra skoðana hans á réttindum samkynhneigðra, innflytjenda og annarra minnihlutahópa, virðist lítill aðdáandi Pírata. Gústaf, sem er kannski hvað þekktastur fyrir að vera bróðir Brynjars Níelssonar, þingmanns Sjálfstæðisflokksins, fjallar í dag um Björn Leví Gunnarsson, þingmann Pírata, sem Ásmundur Friðriksson, þingmaður Sjálfstæðisflokksins, hefur sakað um einelti í sinn garð.
Gústaf segir um Björn Leví:
„Björn Leví Gunnarsson, alþm. er illa innrætt kvikindi og eltihrellir. Samt vældi hann yfir einelti gagnvart sér á unglingsárum í fjölmiðlum um daginn. Hann hefur í hyggju að halda áfram einelti sínu þar sem samþingmaður hans, Ásmundur Friðriksson, má una síendurteknum innihaldslausum ávirðingum – allt gert í þeim tilgangi að sverta hann og niðurlægja. Maður hefur svo sem áttað sig á því að það er misjafn sauður í mörgu fé á alþingi Íslendinga, en að þar skulu nú vera komnar til skjalanna dragúldnar og myglaðar smásálir, finnst mér of mikið af því góða. Þetta er þó í stíl við annað í herbúðum þessara pírata.“
Í gær skrifaði Gústaf færslu á Facebook hvar hann kallaði eftir afsögn Björns vegna málsins:
„Um daginn var Björn Leví Gunnarsson, sem ásakaði samþingmann sinn Ásmund Friðriksson um þjófnað, sífrandi í fjölmiðlum vegna eineltis, sem hann átti að hafa orðið fyrir á unglingsárum. Þessi sami Björn Leví hefur lagt Ásmund í einelti mánuðum saman og nú hefur verið bundinn endir á falskar ásakanir Björns í garð Ásmundar. Mun Björn Leví axla ábyrgð, sem er krafa, sem hann gerir jafnan á hendur öðrum, og segja af sér þingmennsku? Spái því að það muni hann ekki gera og láta líka ógert að biðja Ásmund afsökunar.“