Fiskeldisfrumvarp Kristjáns Þórs Júlíussonar, sjávarútvegsráðherra, sem veitir ráðherra heimild til að gefa út rekstrarleyfi til fiskeldis til bráðabirgða, var samþykkt undir miðnætti í gær.

Var frumvarpið samþykkt með 45 atkvæðum, en sex sátu hjá. Öðlast það strax gildi. RÚV greinir frá.

„Þessi mál voru komin í blindgötu. Með því verklagi sem Alþingi hefur viðhaft í dag þá er búið að opna þetta og þetta er ekki lengur botnlangi heldur opin gata og gefur okkur færi að byggja áfram upp á Ísland á grundvelli gegnsærrar og góðrar stjórnsýslu,“

sagði Kristján við lokaatkvæðagreiðsluna, sem var þakklátur þinginu fyrir skjóta afgreiðslu.

Sátu hjá

„Undir þessum kringumstæðum sit ég hjá en það felur ekki í sér að ég sé á móti málinu. Ég einfaldlega þarf meiri tíma til að vinna svona mál,“

sagði Helgi Hrafn Gunnarsson, Pírati.

Guðmundur Andri Thorsson, Samfylkingu, átti erfitt með að sætta sig við inngripið sem fælist í frumvarpinu og sat einnig hjá:

„Okkur ber skylda til þess gagnvart íslenskri náttúru, gagnvart sjálfum okkur og framtíðinni að við vöndum okkur eins og kostur er, ekki síst þegar um er að ræða framkvæmdir sem hafa djúptæk áhrif á landið okkar.“