Steinunn Ólína Þorsteinsdóttir, leikkona og ritstjóri Kvennablaðsins, segir það ljóst að Gunnar Smári Egilsson og Alda Lóa Leifsdóttir séu hættulegasta par landsins. Steinunn segir þetta á Facebook-síðu sinni og er tilefnið deilur innan stéttarfélagsins Eflingar sem Agnes Bragadóttir fjallaði um í Morgunblaðinu í gær.
Þar var fullyrt að ólga ríkti á skrifstofun Eflingar eftir að Sólveig Anna Jónsdóttir og hennar fylking náði völdum í félaginu og að gjaldkeri og bókari hafi verið hraktir frá störfum vegna ágreinings um reikning frá eiginkonu Gunnar Smára, Öldu Lóu Leifsdóttur.
Sjá einnig:
Gunnar Smári er fokillur út í Kristjönu – „Ég bið ekki að heilsa henni ef þið rekist á hana“
Reikningurinn frá eiginkonu Gunnars Smára var fyrir ljósmyndun og önnur verkefni fyrir félagið, þar á meðal verkefnið Fólkið í Eflingu sem nokkuð hefur verið fjallað um í fjölmiðlum að undanförnu.
Steinunn Ólína segir á Facebook:
„Ansi er hún pínleg þessi sífellda aðför að Gunnari Smára Egilssyni og núna konu hans Öldu Lóu. (Agnes Bragadóttir, dregin upp úr hnífaskúffunni, til hátíðarbrigða, hahahahaha. )“
Steinunn segir að einu megi gilda um hvað fóki finnst um Gunnar Smára og feril hans til þessa. „Gunnar Smári er ekkert venjulegur maður. Hann er ekkert fullkominn maður frekar en við hin en hann er einhver skýrasti samfélagsrýnir okkar tíma og sennilega færasti blaðamaður sem við eigum. Hann er frjáls og á sig sjálfur sem er meira en hægt er að segja um marga aðra blaða/fréttamenn á landinu. Slíkt frelsi er greinilega dýru verði keypt. Fuss.“
Steinunn Ólína leyfir sér að fullyrða að enginn hafi beint sjónum sínum betur að kjörum hinna verst settu en Gunnar Smári og Sósíalistaflokkurinn að undanförnu. Verkefni Öldu Lóu, Fólkið í Eflingu, varpi ljós á Ísland og stöðu verkafólks sem sé mörgum hulin og enn fleirum annt um að hún sé áfram í felum.
„Láglaunafólk á Íslandi á sér enga málsvara sambærilega. Enga. „Ég held að það sé ljóst að Gunnar Smári Egilsson og Alda Lóa Leifsdóttir eru hættulegasta par á Íslandi og vil hér með óska þeim til hamingju með það! Styð þau og baráttu þeirra alla leið.“