Flestir eru kunnugir hugtakinu að „snúsa“, en það er þegar vekjaraklukkan hringir, en þú seinkar næstu hringingu um einhverjar mínútur í viðbót og frestar því framúrförinni sem því nemur.

Samkvæmt könnun MMR er það stuðningsfólk Flokks fólksins sem stundar þetta mest, þegar horft er til stjórnmálaskoðana Íslendinga.

Af stuðningsfólki Framsóknarflokksins kváðust 60% ekki „snúsa“ á morgnanna sem er hærra hlutfall en hjá stuðningsfólki annarra flokka.

Einungis 36% stuðningsfólks Framsóknar kvaðst „snúsa“ einu sinni eða oftar á morgnanna en mestu „snúsararnir“ reyndust stuðningsfólk Flokks fólksins (57%), Viðreisnar (56%) og Pírata (55%).

Athygli vekur að stuðningsfólk Viðreisnar var sérlega kræft í „snúsinu“ en 25% þeirra kváðust „snúsa” fimm sinnum eða oftar á morgnanna.

Samkvæmt könnuninni reyndust Íslendingar öllum svefnværari heldur en svarendur sambærilegra breskra og bandarískra kannana, þar sem einungis 14% Breta og 15% Bandaríkjamann sögðust „snúsa“ þrisvar eða oftar á morgnana, samanborið við rúm 17% Íslendinga. Bretarnir reyndust einnig styðja sig minna við vekjaraklukkur en heil 21% Bretanna sögðust ekki notast við slík óhljóðatól til að vakna á morgnanna, samanborið við einungis 13% Íslendinga og 8% Bandaríkjamanna.