Í júlí 2018 voru fluttar út vörur fyrir tæpa 50,5 milljarða króna og inn fyrir 63,5 milljarða króna fob (67,8 milljarða króna cif). Vöruviðskiptin í júlí, reiknuð á fob verðmæti, voru því óhagstæð um 13 milljarða króna. Í júlí 2017 voru vöruviðskiptin óhagstæð um 20,7 milljarða króna á gengi hvors árs.¹ Vöruviðskiptahallinn í júlí 2018 var því 7,7 milljörðum króna minni en á sama tíma árið áður. Án skipa og flugvéla nam vöruviðskiptahallinn í mánuðinum 15,1 milljarði króna samanborið við 20,1 milljarð króna halla í júlí 2017.

Á tímabilinu janúar til júlí 2018 voru fluttar út vörur fyrir 337,5 milljarða króna en inn fyrir 433,9 milljarða (463,0 milljarða króna cif). Halli á vöruviðskiptum við útlönd nam því 96,4 milljörðum króna reiknað á fob verðmæti. Á sama tíma fyrir ári voru vöruviðskiptin óhagstæð um 105,8 milljarða á gengi hvors árs. Vöruviðskiptahallinn á tímabilinu janúar til júlí er því 9,3 milljörðum króna minni en á sama tíma fyrir ári. Án skipa og flugvéla nam vöruviðskiptahallinn 81,8 milljörðum króna, samanborið við 94,1 milljarð króna á sama tíma árið áður.

Útflutningur
Á fyrstu sjö mánuðum ársins 2018 var verðmæti vöruútflutnings 51,3 milljörðum króna hærra en á sama tímabili árið áður, eða 17,9% á gengi hvors árs.¹ Iðnaðarvörur voru 53,5% alls útflutnings og var verðmæti þeirra 15,2% hærra en á sama tíma árið áður. Hækkunina á milli ára má fyrst og fremst rekja til útflutnings á áli. Sjávarafurðir voru 39,5% alls vöruútflutnings og var verðmæti þeirra 26,4% hærra en á sama tíma árið áður. Aukning var í nær öllum undirliðum sjávarafurða en aukninguna á milli ára má meðal annars rekja til sjómannaverkfalls í byrjun árs 2017.

Innflutningur
Á fyrstu sjö mánuðum ársins 2018 var verðmæti vöruinnflutnings 42 milljörðum króna hærra en á sama tímabili árið áður, eða 10,7% á gengi hvors árs.¹ Mestu munaði um innflutning á eldsneyti og fjárfestingu í flugvélum.

1) Hagstofa Íslands birtir ekki lengur tölur um vöruviðskipti á föstu gengi. Á vef Hagstofu Íslands er að finna töflu um hlutfall einstakra gjaldmiðla í vöruviðskiptum.

Mánaðarlegar tölur um vöruviðskipti líðandi árs eru endurskoðaðar allt árið og því geta tölur fyrri mánaða árs breyst með útgáfu nýrra mánaðartalna. Endanlegar tölur fyrir hvert ár eru gefnar út á vormánuðum næsta ár á eftir.

Talnaefni

Vöru- og þjónustujöfnuður við útlönd jákvæður um 5,2 milljarða á öðrum ársfjórðungi 2018

Samkvæmt bráðabirgðatölum var vöru- og þjónustujöfnuður á öðrum ársfjórðungi 2018, eins og hann birtist í þjóðhagsreikningum og greiðslujöfnuði, jákvæður um 5,2 milljarða króna en hann var jákvæður um 14,7 milljarða á sama tíma árið 2017, á gengi hvors árs. Umreiknaður vöruskiptajöfnuður var óhagstæður um 49,8 milljarða króna en þjónustujöfnuður var hagstæður um tæpa 55 milljarða.

Heildarútflutningstekjur á öðrum ársfjórðungi 2018 vegna vöru- og þjónustuviðskipta námu 328,3 milljörðum króna en heildarinnflutningur á vörum og þjónustu nam 323,1 milljörðum króna.

Þessar upplýsingar koma fram í brúartöflu á vef Hagstofunnar sem samræmir staðla vöruviðskipta og greiðslujafnaðar.