Á leiðtogafundi Donald Trump, Bandaríkjaforseta, og Kim Jong-un, einræðisherra í Norður-Kóreu, í Singapore 12. júní var tilkynnt að ríkin ætluðu að semja um kjarnorkuafvopnun Norður-Kóreu. En síðan hefur lítið gerst í þeim málum. Nú hafa bandarísk stjórnvöld sagt að ekki sé útilokað að hefja aftur heræfingar í Suður-Kóreu en það var eitt af lykilatriðunum í samningi leiðtoganna að slíkum æfingum yrði hætt. Það þykir til marks um að viðræðurnar séu í öngstræti að bandarísk stjórnvöld íhugi nú að hefja æfingar á nýjan leik.

Á undanförnum vikum hafa borist fregnir af slæmu gengi í viðræðunum og bandarískir fjölmiðlar hafa velt því upp hvort viðræðurnar séu komnar í algjört öngstræti. CNN skýrði nýlega frá því að stjórnvöld í Norður-Kóreu hafi sent harðort bréf til Hvíta hússins þar sem hótað var að hætta samningaviðræðum þar sem Bandaríkin hafi ekki getað staðið undir væntingum norðanmanna.

Mike Pompeo, utanríkisráðherra, átti að vera í Norður-Kóreu nú í vikunni til að halda viðræðum áfram en ferð hans var aflýst.

Þá kom nýlega fram í skýrslu Sameinuðu þjóðanna að ekki hefði dregið úr umsvifum á kjarnorkutilraunasvæðum Norður-Kóreu. Bæði bandarískar og suður-kóreskar leyniþjónustur segja það sama.

Ef rétt reynist að hugur hafi ekki fylgt máli hjá Norður-Kóreu er það mikill ósigur fyrir Donald Trump sem hefur ekki sparað lýsingarnar á árangri fundarins og hefur hælt sjálfum sér í hástert fyrir að hafa náð samningum við Norður-Kóreu.

Meðal embættismanna í Washington er sú skoðun ansi algeng að Kim Jong-un hafi leikið tveimur skjöldum allan tímann og hafi aldrei haft í hyggju að láta af kjarnorkuvopna- og eldflaugabrölti sínu. Leiðtogafundurinn hafi aðeins verið gott tækifæri til að sýna sig með valdamesta manni heims og reyna að bæta ímynd Norður-Kóreu út á við.