Skáldið og athafnamaðurinn Huang Nubo virðist ekki vera sérlega mikill dipómati.

Maður hefur ekki heyrt mikið kvartað yfir áformum um að leigja honum land á Fjöllum til fjörutíu ára.

En þá hellir hann olíu á eld með því að segjast vilja fá landið til níutíu og níu ára.

Sem er mjög langur tími. Fyrir níutíu og níu árum var Morgunblaðið stofnað – þá varð sá merki atburður í sjálfstæðisbaráttunni að Einar Pétursson var tekinn með bláhvíta fánann sem hann sigldi um með í báti á höfninni.

Það er enginn á lífi lengur sem er til frásagnar um þessa atburði.

Nubo virðist líka gera það nánast að gamni sínu að storka Ögmundi Jónassyni. Og Ögmundur er fljótur að bregðast við og skrifar:

„Ég held að erlendir auðkýfingar eigi að fara varlega í að hreykja sér á kostnað íslenskra stjórnmálamanna sem vilja sporna gegn því að vaðið sé á skítugum skónum inn á Ísland.“