Tryggvi Þór Herbertsson spyr hvort allir blaðamenn séu vinstrisinnaðir og vísar í könnun frá Noregi.

Eins og Stefán Snævarr, prófessor í Noregi, sagði í Silfrinu um daginn eru Norðmenn og hafa verið talsvert til vinstri við Ísland.

Og ég held að þetta sé ekki hægt að yfirfæra á fjölmiðla á Íslandi. Yfirmenn þeirra hafa til dæmis löngum komið úr röðum Sjálfstæðismanna – þaðan eru til dæmis ritstjórar stærstu blaðanna. Hér hafa löngum setið hægristjórnir og fjölmiðlar verið þeim nokkuð leiðitamir.

Tryggvi er að velta fyrir sér hvers vegna málflutningur Sjálfstæðismanna fái ekki meiri hljómgrunn í fjölmiðlum.

Ég er svosem ekki viss um nema hann heyrist ágætlega, en Páll Vilhjálmsson fer kannski nærri um skýringuna. Innan Sjálfstæðisflokksins eru ennþá mörg óuppgerð mál.

Tryggvi var sjálfur hjá hinum fallna fjárfestingafyrirtæki Öskum Capital, það verður ekki séð annað en að fyrir Þorgerði Katrínu sé vandlifað í pólitíkinni vegna skuldamála eiginmanns hennar , Guðlaugur Þór er beinlínis með landsfundarályktun á bakinu um að hann skuli hætta á þingi, Bjarni Benediktsson hefur verið nefndur í sambandi við vandræðamál innan Glitnis og Illugi Gunnarsson er utan þings vegna rannsóknar saksóknara á peningamarkaðssjóðum Glitnis.

Það er kannski hægt að láta eins og ekkert sé, en þetta veikir flokkinn verulega.