Aðdáendur Kardashian-Jenner-systranna hafa lengi velt fyrir sér hvort og hversu margar fegrunaraðgerðir þær hafi farið í. Þær systur sem hafa ábyggilega oftast verið í umræðunni hvað þetta varðar eru Kim Kardashian og Kylie Jenner. Sú síðarnefnda er yngst systranna, en hún hefur verið í sviðsljósinu frá unga aldri vegna raunveruleikaþáttanna Keeping Up with the Kardashians.
Þegar að Kylie varð fullorðin fóru margir að velta fyrir sér hvort að hún hefði farið í fegrunaraðgerðir og báru saman gamlar myndir við nýjar.
TikTok-stjarnan Julia Gisella birti myndband á samfélagsmiðlinum umdeilda í dag þar sem hún sýndi hvernig væri með smávægilegum breytingum hægt að taka í burtu meintar lýtaaðgerðir Kylie.
Julia, sem hefur eflaust notast við myndvinnsluforrit eins og Photoshop, minnkaði varir Kylie auk þess sem hún breytti nefi, augum, augabrúnum og kjálka hennar. Mörgum þótti niðurstaða Juliu minna á Kylie eins og hún var fyrir nokkrum árum.
Cheetsheet fjallaði einnig um myndband Juliu og fegrunaraðgerðir Kylie Jenner. Miðillinn fullyrti að Kylie hefði einhvern tíma farið í aðgerð eða tvær. Raunveruleikastjarnan á þó að hafa sagst vera of hrædd við að fara í slíkar aðgerðir, fyrir utan eina, aðgerð á vörum.