Fyrirsæturnar Bella og Gigi Hadid eru frægar, fagrar og ríkar og þær kunna aldeilis að njóta lífsins. Systurnar eru báðar á lista Forbes yfir tíu launahæstu fyrirsætur heims auk þess sem þær raka inn peningum sem áhrifavaldar en samanlagt eru þær með 85 milljónir fylgjanda á samfélagsmiðlum.
En Bella og Gigi spreða ekki bara í vitleysu – þær hafa báðar ákveðið að tryggja framtíð sína með kaupum á glæsilegum lúxusíbúðum.
Bella sem er 24 ára, splæsti 6,1 milljón Bandaríkjadala eða sem samsvarar 856 milljónum króna í 202 fermetra íbúð í Soho hverfinu í New York. Íbúðin er með tveimur svefnherbergjum og tveimur baðherbergjum og er einstaklega smart og glæsileg. Íbúðina keypti Bella af stofnanda Joe & the Juice keðjunnar, Kaspar Basse. Húsið var byggt árið 1877 og notað sem verslunarrými en árið 2016 var rýminu breytt í 15 lúxusíbúðir.
Íbúð Bellu í Soho: Íbúðin er með æðislegum svölum, ítölskum glerskápum í fataherberginu og takið eftir víngeymslunni undir stiganum; hún rúmar 100 flöskur.
Eldri systirin Gigi, sem er 25 ára, greiddi 5.8 milljónir dala eða sem samsvarar 814 milljónum íslenskra króna fyrir 270 fermetra, þriggja herbergja íbúð með þrjú og hálft baðherbergi í Noho hverfinu í New York. Íbúðin sem er á 10 Bond Street er eina raðhúsið í götunni og er hannað af Annabelle Selldorf.
Fyrir átti Gigi íbúð í sama húsi sem hún keypti árið 2015 og kunnugir segja hana ráðgera að sameina íbúðirnar í eina risastóra glæsiíbúð. Nýja slotinu fylgir bílskúr ásamt 70 fermetra svölum með eldstó.