Allt er afstætt og hárlitur er engin undantekning. Á Skotlandi þar sem 13% þjóðarinnar er rauðhærð vekur liturinn litla eftirtekt en á móti er líklegra að rauðhærðir séu meira áberandi í Bandaríkjunum þar sem rautt hár er mjög sjaldgæft og talan er mun lægri eða um 2%. Miðað við þessar tölur skarta grunsamlega margar stjörnur rauðum makka og ástæðan er einföld; þær lita á sér hárið til að vekja meiri eftirtekt.

Þessar glæsilegu dívur hafa vakið eftirtekt með rauðum lokkum en eru í raun ljós- eða skolhærðar. Sumar fyrir ákveðið hlutverk en aðrar einfaldlega til að vekja á sér athygli. „Um leið og ég varð rauðhærð þótti fólki ég frekar áhugaverð í stað þess að finnast ég daðursgjarn kjáni. Það var magnað að sjá hvernig eitt atriði í útliti mínu breytti áliti fólks á mér og hárið á mér varð í kjölfarið áhrifamikið verkfæri sem ég gat nýtt mér í leiklistinni,“ var haft eftir leikkonunni Amy Adams árið 2016.

Amy Adams 

American Hustle leikkonan segir rauða hárið hafa hjálpað til við að aðgreina hana frá öllum hinum ljóskunum í Hollywood.

Sophie Turner  

Sophie fór með hlutverk hinnar rauðhærðu Sansa Stark í Game of Thrones  og á tímabili þurfti að lita hárið á henni vikulega svo ljósu lokkarnir sæjust ekki en eftir nokkur ár var hún látin vera með hárkollu.

Emma Stone

Emma er ljóshærð en vakti fyrst eftirtekt sem rauðka í myndunum Superbad og Easy A. Hún segist elska rauða hárið og kveðst vera með rétta litaraftið.

Gillian Anderson

X-Files töffarinn Gillian Anderson var rauðhærð í þáttunum.

Deborah Ann Woll

True Blood leikkonan fór að lita hárið rautt löngu áður en hún fékk hlutverk í þáttunum. Í viðtali við Elle árið 2009 sagði hún að sem ljóska með ljósa húð hafi hún horfið í fjöldann. Hún hafi því ákveðið að lita á sér hárið rautt til  að vekja á sér eftirtekt og taka pláss í heiminum.

Cynthia Nixon

Sex and the City rauðkan Cynthia er í raun ljóska.

Kirsten Dunst

Það muna flestir eftir Kirsten í hlutverki Mary Jane í fyrstu Spider Man myndinni. Þar var hún eldrauðhærð og segist hafa í kjölfarið nælt sér í öðruvísi menn en áður. „Ég næ mér í menn sem er meira spunnið í. Menn sem eru hugsuðir.“

Kate Winslet

Þó svo að margir hafi þekkt Kate Winslet áður en hún lék hina rauðhærðu Rose í Titanic þá var það hlutverkið sem kom henni endanlega á kortið.

Brittany Snow

Leikkonan Brittany Snow þurfti að lita hárið rautt fyrir Pitch Perfect myndirnar en fílaði það alls ekki. Hún var sérstaklega óánægð með dökkrauða hárið sem hún skartaði í Pitch Perfect 2 og var mjög ánægð þegar því tímabili lauk.