Í miðju berangri hrárrar eyðimerkurfegurðar Canyon Point, Utah stendur undurfagri sumarleyfisstaðurinn Amangiri. Þetta fimm stjörnu athvarf ríka og fræga fólksins hefur notið gríðarlegra vinsælda síðan hann opnaði árið 1998 og þangað flykkjast stjörnurnar. Síðustu tvær vikurnar hafa Bieber hjónin Hailey og Justin dvalist þar, sem og Kourtney Kardashian, Scott Disick og börnin þeirra þrjú en meðal tíðra gesta eru Brad Pitt, Victoria Beckham og Gwyneth Paltrow.
Amangiri er staðsett við landamæri Utah og Arizona fjarri heimsins glaumi og því kjörinn staður til að njóta kyrrðar og náttúrufegurðar. Steypt skyggni, viðarrúm, flennistórir gluggar og hvítir fletir einkenna híbýlin sem eru hönnuð í minimalískum stíl en það er samt enginn afsláttur gefinn af lúxusnum.
Justin og Hailey Bieber eru miklir aðdáendur Amangiri. Þau nutu þar lífsins saman í lok júní og birtu nokkrar myndir á samfélagsmiðlum þar sem þau dásömuðu staðinn. Amangiri er einnig vinsæll áfangastaður til að fagna tímamótum. Kim Kardashian hélt upp á 37 ára afmælið sitt í Amangiri árið 2017. Hollenski plötusnúðurinn Tiësto og Annika Backes giftu sig þar í fyrra og fyrirsætan Emily Ratajkowski eyddi hveitibrauðsdögunum þar ásamt nýbökuðum eiginmanni sínum, Sebastian Bear-McClard.