Söngfuglinn og flippgosinn Miley Cyrus er óhrædd við að prófa sig áfram í tískustraumum og stefnum og er alltaf til í eitthvað nýtt. Það hefur mikið vatn runnið til sjávar síðan hún steig sín fyrstu sveitasöngvaskref sem Disney stjarnan Hannah Montana þegar hún var ellefu ára í kúrekastígvélum og okkar kona hefur gengið í gegnum alls konar tískutímabil.
Á MTV tónlistarhátíðinni árið 2013 mætti Miley til leiks með rakað hár og tvö púkahorn eða snúða ofan á höfðinu. Tveimur árum síðar átti hún rosalega innkomu á sömu verðlaunahátíð þegar hún skipti 16 sinnum um föt og skartaði tagli með síðum dreddum. Þegar hún gaf út plötuna sína Malibu árið 2017 féllu tvítóna lokkarnir í léttum liðum og í fyrra klippti hún á sig topp.
Það nýjasta er gamli góði mullet-inn eða sítt að aftan sem margt miðaldra fólk minnist með hryllingi, nú eða nostalgíu. Í janúar frumsýndi Miley fyrsta vísinn að þessari umdeildu hárgreiðslu en það var svo nú fyrir skemmstu í miðju Covid-fári að mamma hennar, Tish Cyrus, tók hana í heimaklippingu. Hvort mæðgurnar hafi verið undir áhrifum Joe Exotic, aðalstjörnu heimildaþáttaraðarinnar Tiger King, verður látið ósagt en það er óhætt að segja að Miley púlli greiðsluna betur. Hún bara púllar einfaldlega allt.