Hollywood leikarinn Ben Affleck og kúbneska Bond-skvísan Ana de Armas fagna um þessar mundir hálfs árs afmæli sínu og virðast ljóma af hamingju.
Ben og Ana kynntust við tökur á spennumyndinni Deep Water í fyrra. Þau fóru leynt með sambandið til að byrja með en eftir að þau voru mynduð saman á Kúbu í mars hafa þau verið óaðskiljanleg í sóttkví á heimili Bens í Los Angeles. Parið sést saman í göngutúrum með hundinn þar sem þau hlæja dátt og virðast æði samrýnd. Þau hafa meira að verið spottuð í sömu mosagrænu skyrtunni. Hvort þau eiga eins skyrtur eða eru bara svona nýtin verður látið ósagt en þetta er fínasta skyrta.
Á nýjustu myndunum af parinu vekur það athygli að hárið á Ben og skegg hefur dökknað um nokkra tóna og það er einhver mafíósabragur yfir honum. Kannski er hann að reyna að yngja sig upp fyrir Önu sem er 15 árum yngir en kannski er þetta fyrir nýtt hlutverk. Við skulum bara vona það.
Ben hefur átt í sambandi við ekki minni kanónur en Gwyneth Paltrow, Jennifer Lopez og Jennifer Garner sem hann var kvæntur í 13 ár og á með henni börnin Violet, Seraphina og Samuel. Ana var gift spænska leikaranum Marc Clotet en þau skildu árið 2013.
Fræg og fögur Hollywood pör fá gjarnan gælunafn og þegar Ben var með Jennifer Lopez gengu þau undir sameiginlega nafninu Bennifer. Eftir að því sambandi lauk og Ben kvæntist Jennifer Garner var uppfærslan augljós og parið hlaut nafnbótina Bennifer 2.0. En hvað með Ben og Ana? Benana …?