Poppprinsessan Britney okkar er í stuði þessa dagana og geislar af sjálfsöryggi. Hún deildi í gær tveimur myndum af sér með fylgjendum sínum sem eru tæplega 26 milljónir. Á þeirri fyrri er hún í agnarsmáu bikiníi og líkaminn þakinn hvítu hennahúðflúri en á þeirri síðari leyfir hún bóheminu í sér að skína.
„Ég missti mig aðeins í henna!!! Ég held ég sé að reyna að vera bóhem á seinni myndinni … ekki alveg viss hvað hendur á mjöðmum eiga að fyrirstilla!!!! Ætli ég sé ekki að heimta athygli!!!!,“ segir söngkonan sem hefur augljóslega dálæti á upphrópunarmerkjum. Britney varð að ósk sinni og hlaut helling af athygli og athugasemdum fyrir vikið. Einn fylgjandi skrifaði: „Þú hefur athygli okkar Britney! Við sjáum þig! Við heyrum í þér!“
Eins og margir vita var Britney svipt sjálfræði árið 2008 og hafa faðir hennar og lögmaðurinn Andrew Wallet verið tilsjónarmenn hennar síðan. Hreyfingin #FreeBritney hefur verið að sækja í sig veðrið að undanförnu en hún samanstendur af fólki sem telur að Britney sé kúguð, verið sé að svindla á henni og að hún ætti að endurheimta sjálfræði sitt. Þegar þetta er ritað hafa rúmlega 102.000 manns skráð sig á undirskriftalistann.