„Hey Robert De Niro, já ég er að tala við þig stóra grenjuskjóðan þín!“ Svona hefst nýleg Instagramfærsla Mickey Rourke þar sem hann lætur Robert De Niro heyra það. Nei, Mickey var ekki að klára tólf ára bekk, hann er 67 ára og hefur eldað grátt silfur við kollega sinn í 33 ár. Þetta hófst allt árið 1987 þegar þeir kappar léku saman í kvikmyndinni Angel Heart. Á þeim tíma leit Mickey upp til Roberts sem hann segir hafa hunsað sig við tökur með því að biðja hann að yrða ekki á sig undir því yfirskini að þannig héldust þeir í karakter. „Það særði mig smá því ég leit upp til hans,“ var haft eftir Mickey á sínum tíma. „Ég lít ekki lengur upp til hans. Ég lít í gegnum hann.“
Instagramfærslan snýst um aðra mynd, The Irishman, en Mickey vill meina að Robert sé ástæða þess að hann fékk ekki hlutverk í henni. Hann segir að leikstjórinn Martin Scorsese hafi viljað fá hann í myndina en umboðsmanni hans hafi svo verið tjáð að Robert neitaði að leika með honum í myndinni og hann því misst af hlutverkinu. Þetta kannast Robert ekki við og í yfirlýsingu frá fulltrúa hans kemur fram að Mickey hafi aldrei komið til greina í hlutverkið. Yfirlýsingin sem rataði í dagblöðin á sínum tíma rataði nýverið fyrir augu Mickey sem brást ókvæða við yfir að vera sakaður um lygi og hnoðaði í færslu:
„Hey Robert De Niro, já ég er að tala við þig stóra grenjuskjóðan þín. Vinur minn sagði mér að þú hefðir látið hafa eftir þér í dagblaði að ég væri rugludallur og lygari. Hlustaðu nú herra harðjaxl í kvikmyndum, þú ert fyrsta manneskjan sem hefur kallað mig lygara og það í dagblaði. Ég skal segja þér það að þegar ég hitti þig ræfillinn þinn sver ég til guðs, ömmu, bræðra minna og hundanna minna að ég mun gera þig 100% að fífli.“
Engin viðbrögð hafa borist frá herbúðum Robert De Niro við þessu nýjasta útspili.