Raunveruleikastjarnan Molly-Mae Hague hefur deilt sorgarfregnum með fylgjendum sínum á Instagram. Hvolpur hennar, Mr Chai, lést aðeins sex dögum eftir að hún fékk hann í afmælisgjöf frá kærasta sínum, Tommy Fury. Molly-Mae og Tommy kynntust í raunveruleikaþættinum vinsæla Love Island.
Molly varð 21 árs í síðustu viku og fékk hvolpinn í afmælisgjöf frá Tommy á föstudaginn síðastliðinn. Nokkrum dögum seinna varð hann veikur og lést. Molly-Mae sagði fylgjendum sínum frá þessu á Instagram.
„Við Tommy erum miður okkar og í áfalli. Fallegi nýi hvolpurinn okkar, Mr Chai, veiktist fyrir nokkrum dögum og hefur því miður látið lífið,“ segir Molly-Mae á Instagram.
Hún segir að á stuttum tíma hafi hún fallið fyrir hvolpinum og ekki séð sólina fyrir honum. „Og við hefðum ekki getað hugsað betur um hann. Við elskuðum hann svo mikið,“ segir hún.
Molly-Mae vonast eftir að fá einhver svör á næstu dögum frá dýralækni um orsök veikindanna. „Við erum í áfalli yfir þessu,“ segir hún.
Mr Chai var þegar orðinn frægur með um 150 þúsund fylgjendur á Instagram.