Það er víst löglega hægt að selja sálu sína í dag, eins og söngkonan Grimes sýndi fram á á dögunum. Þetta kemur fram á vefmiðlinum Daily Mail. En hún hefur útbúið lögfest skjal með lögfræðingi sem geymir eignarétt á hluta af sál hennar. Það skiptir líklega öllu máli hvort þú heitir Jón eða séra Jón, hversu há upphæð fæst fyrir hverja prósentu af sálinni og má ætla að standi yfir verðstríð yfir sálarskjalinu hennar Grimes.
Söngkonan Grimes (32), sem heitir Claire Boucher, opnaði í gær listasýningu þar sem hún sýnir alheiminum teikningar, prentverk, ljósmyndir og hugmyndafræðileg verk eftir sjálfa sig. Mun sýningin bera nafnið „Selling out“ eða eins og það myndi kannski útleggjast á hinu ástkæra ylhýra, „Sjálfið á útsölu“.
Grimes hefur verið að skapa list í mörg ár en mun nú opna sína fyrstu gallerísýningu, í Maccarone Los Angeles. Sýningin stendur fram til 31. ágúst.
Þó svo Grimes sé einna þekktust fyrir tónlistaferil sinn þá er myndrænn framsetning hennar sem tengist tónlistinni afar auðþekkjanleg. Sjálf lýsir hún stílnum sem beittu hrollvekju-anime. „Ég lít á sjálfa mig fyrst og fremst sem myndlistamann og mér hefur alltaf fundist frekar undarlegt að fólk þekki mig mikið frekar fyrir tónlistina mína.“
Titilverk sýningarinnar, sem nefnist „Kærasta milljarðamæringsins Elon Musk“ er sérlega forvitnilegt og torkennilegt. En um er að ræða lögfest skjal upp á prósentu af sál Grimes. Í verkinu skoðar Grimes frægðina og sjálfsmyndina og segir hún í samtali við Bloomberg að upphaflega hafi hún ekki viljað selja verkið. „Ég vildi ekki að neinn myndi kaupa verkið og hélt að ef við settum 10 milljónir bandaríkjadollara (um 1.400 milljónir ISK) á verkið þá myndi það ekki seljast.“
En áhugi Grimes jókst sífellt þegar hún fór að skoða smáatriðin með lögfræðingi. „Því dýpra sem við köfuðum, því áhugaverðara varð þetta út frá heimspekilegu sjónarhorni.“ Hún fékk einnig aukinn áhuga á því að vinna að listsköpun með lögfræðingi. „Mér fannst hugmyndin um listaverk í formi lögfræðiskjals einfaldlega hljóma svo forvitnilega.“
Þó svo upphaflega hugmyndin hafi verið að selja verkið á 10 milljónir, þá hefur Grimes nú ákveðið að taka besta tilboðinu sem býðst. „Vill maður í alvöru, í núverandi ástandi, setja svo hátt verð á nokkuð?“ spyr hún og á við covid-19 faraldurinn.